«Blogs»: estrutura

Aínda que existen abondas diferenzas entre uns blogs e outros, definidas tanto polos servidores como polos propios usuarios, todos eles acostuman contar con (Domínguez, 2007, http://web.educastur.princast.es/proyectos/cuate/eblog/blogs_y_educacion.pdf e Ortiz de Zárate, 2008):

- Unha cabeceira. Nela acostuman a aparecer o título e o subtítulo do blog, un logotipo que o singulariza, algún que outro elemento decorativo, un enlace á páxina de inicio e mais outros enlaces básicos, como por exemplo a unha páxina web da cal dependa, a un enderezo electrónico ou ao curriculum vitae do/a seu/a autor/a ou autores/as.

- Unha ou varias barras laterais ou side bars, nas que se inclúe unha explicación do contido do blog, unha zona de presentación e contacto co/a autor/a ou autores/as chamada «perfil», un arquivo para acceder por datas (meses, semanas, días) aos contidos que non aparecen en portada, un listado de categorías ou etiquetas polas que se clasifican os artigos, varios enlaces relacionados coa temática do blog, que reciben o nome blogroll; un visor da actividade do blog a través de contadores de visitas e de visitantes, do número de blogs que enlazan con ese, ou tamén a través de mapas de sitios web que o enlazan; un buscador para dentro do propio blog, para a blogosfera completa ou ben para a Rede en xeral; banners de adhesión a unha campaña ou de publicidade con motivo dalgunha iniciativa; publicidade, especialmente contextual (adsense); un apartado de sindicación para que outras persoas poidan subscribirse aos contidos dese blog; unha icona da licenza Copyleft que, a diferenza do Copyright, ofrece contidos á comunidade de forma gratuíta, pero con reserva de certos dereitos como os de cita ou de uso non comercial; e outros elementos variados a gusto do/a autor/a ou autores/as e que inclúen calquera cousa que sexa dixitalizábel.

- E un espazo destinado ás entradas, apuntes ou posts, no que podemos observar só un certo numero destas en orde cronoloxicamente inversa, que tipicamente soen ser dez. Dentro de cada unha delas, podemos ver a data e a hora de publicación do artigo, o seu título, un resumo do seu contido e un enlace ao artigo completo («ler máis») ou ben directamente o corpo ou texto do artigo, un pé de artigo ou footer no que se atopan varios enlaces ás categorías e etiquetas a través das que se organiza, o nome do/a seu/súa autor/a ou autores/as, un enlace permanente URL ou permalink dese artigo, o número de comentarios cos que conta, un enlace para acceder a eles, outro enlace para realizalos e, se cadra, diversos elementos multimedia, como pode ser unha imaxe (fotografía, gráfico, etc.), una presentación de diapositivas, un arquivo de son (podcast) ou un vídeo.